Heita Allermooistes!!

Dis soms moeilik as jy ‘n waansinnig geesdriftige liedjieskrywer is, maar ’n ongretige sanger. Dit beteken glad nie dat ek nie alte graag sing nie – by die huis, in die stort of in die motor voel ek ook maar soos ’n superster, maar dit vat moed om voor mense te sing!

Dis nou nie of ek nie ’n noot kan hou nie. Ek het darem my hele skoolloopbaan deur altyd in die een of ander koor gesing. Vir geruime tyd daarna in ’n kerkkoor of twee. Vir ’n hele aantal jare was ek ook onoffisieël en letterlik ‘begrafnissanger’. En alhoewel onkonvensioneel is dit waar my liefde vir sing tot volle reg gekom het. Ek het besef dat ek op hierdie manier mense kan aanraak en dat dit vir my sekerlik die grootste genoegdoening ooit gee wanneer ek weet dat ek deur my liefde vir musiek én mense, juis hulle kan help troos en troetel wat dit die nodigste het.

Uiteindelik het liedjieskryf ook bygekom – amper asof dit die natuurlikste ding in die wêreld was vir my. Hoe en waar bly ’n storie vir ’n ander dag…

En so staan ek op die vooraand van iets wat vir my voel soos die geboorte van ’n nuwe baba. Behalwe dat die duur van hierdie ‘swangerskap’ meer met dié van ’n olifant s’n ooreenstem (wonder ek nou juis hoe lank walvisse swanger is?). Ja, ek stel uiteindelik my cd vry! ’n Langverwagte droom wat by tye gedreig het om presies dit te bly: ’n droom.

Hoe meer die droom werklikheid word, hoe meer surreal voel dit by tye. Hoe meer mense terugvoer gee oor my songs (ja, elke ma hou tog maar daarvan om te hoor dat haar baba die mooiste óóit is J …) – hoe meer mense in die afgelope tyd na afloop van ‘n optrede gevra het of ek ’n cd te koop het, hoe meer gevra het waar en wanneer ek weer sing, of dat ek hulle moet laat weet van my optrede – hoe meer my droom dus werklikheid begin word het, hoe meer het ek gevoel ek moet myself knyp – gereeld en aanhoudend, want dit kan mos nie??!!

Laat my dink aan die volgende:

God whispers in your soul and speaks to your mind. Sometimes when you don’t have time to listen, He has to throw a brick at you to get your attention. It’s your choice: listen to the whisper or wait for the brick!!

Ek is al tóégegooi onder die bakstene!! En danksy bloed en vlees engele om my het my onvermoë om in myself te glo soos mis voor die son verdwyn – dis hulle wat my toelaat om met my kop in die wolke te sweef, maar my voete op die aarde hou. Dis hulle wat verstaan dat my songs en dit wat ek daardeur vir ander wil sê en beteken vêr verwyderd staan van blote entertainment. Ja, ek wil entertain ook! Ek wil jou saam met my laat lag ook. Maar ek wil ook saam met jou huil. Dis my manier om aan my lewe waarde te gee. Dis my bydrae. Hoe skraal en gering ookal, hoop ek bo alles, dat my (hierdie) manier jou met watter liedjie ookal, vir die duur daarvan ’n bietjie vreugde of plesier sal gee,

My werklikheid dus nou is: dat my cd vrygestel word op 25 Februarie 2009. Feit is dat NIKS in die lewe toevallig gebeur nie. Voorbeeld: ek besluit dat die 25ste Februarie na ’n goeie dag klink vir my. Ek wik en weeg oor opsies oor waar om dit te hou en besluit ek sal die Centurion Teater nader (ek was bevoorreg om verlede jaar daar tydens ’n Koos Kombuis show my engelse weergawe van Lisa se klavier daar te sing en ek is gereeld daar as toeskouer). Enige regdenkende (en ingeligte) mens weet dat die teater vir weke en selfs maande vooruit bespreek is deur al wat sanger, eenmanstuk en ensemblesis en jy dit nie sommer net gou-gou vir jou eie gebruik kan bespreek nie. Daardie feit skeel my om die een of ander rede minder (of het ek dit glad nie oorweeg nie?) en ek skakel vir Paulette. Seg vir haar van my planne en noem die datum. Sy kyk in haar dagboek en sê: “Die show wat geskeduleer was daardie aand is gekanselleer”! Nogal!? Nê?! En ek besef weereens – hier kom ‘n baksteen, BB, as jy dan nou regtig nie wil hoor nie! En so gee ek een stappie nader aan die werklikheid anderkant die droom.

Vir die mense wat my toevou, wat my aanspoor, wat my dra en koester, wat dinge in die agtergrond sommer net laat gebeur, wat hele berge versit terwyl ek net aangedui het dat die spreekwoordelike molshopie vir my dalk soms ietwat angsaanjaend en groterig voorkom (kaartjies, besprekings, lyste en lyste kontakpersone, posters, webblad, cd omslag drukwerk, deurnagluister van die cd, morele ondersteuning, “ons-weet-jy-kan’s”, liaison, (het ek al omslag drukwerk genoem??) – ag sommer al die dinge wat my op gereelde basis laat hiperventileer – Helge, Krista, Jaco – ek wéét julle drie ‘doen nie’ die ‘spiritual’ ding soos ek nie, maar God se genade en liefde is nog nooit vir my so konkreet in mensvorm verwesenlik, soos in julle nie. Ek hoop ek kan eendag ’n geleentheid kry om genoeg dankie’s sê…

Vir almal wat my al gelukgewens het; die van julle wat die lang pad ken wat ek al geloop het; vir elkeen wat al navraag gedoen het; vir ieder wat al ’n kaartjie bespreek het – vir elkeen wat al gevra het vir die cd – en vir die wat dit al bestel het nog voor julle dit gehoor het: dankie, dankie, duisend dankies!!

Nou is dit styf duimvas hou van julle kant af. Epos my gerus met behulp van die vorm hier langsaan op die “Kontak” knoppie – of bel Krista op die nommer wat daar aangebring is. Ek weet daar is nog ‘n paar kaartjies beskikbaar en sal julle so graag daar wil sien! Die eerste oplaag CD’s sal daardie aand ook beskikbaar wees.

Be Blessed Allermooistes!!

BBx